តុលាការកំពូលបដិសេធការសុំនៅក្រៅឃុំរបស់លោក មាជ សុវណ្ណារ៉ា និងលោក អ៊ុក ពេជ្រសំណាង តុលាការកំពូលបដិសេធការសុំនៅក្រៅឃុំរបស់លោក មាជ សុវណ្ណារ៉ា និងលោក អ៊ុក ពេជ្រសំណាង
VOD៖ ឡាយ សាមាន
តុលាការកំពូលបដិសេធការសុំនៅក្រៅឃុំរបស់លោក មាជ សុវណ្ណារ៉ា និងលោក អ៊ុក ពេជ្រសំណាង ខណៈមេធាវីការពារក្ដី និងអ្នកឃ្លាំមើលចាត់ទុកថាជារឿងអយុត្តិធម៌ និងនយោបាយ ។
ចៅក្រមនៃតុលាការកំពូលនៅព្រឹកថ្ងៃពុធនេះបានអានសាលដីកាបដិសេធមិនឲ្យសកម្មជនគណបក្សសង្គ្រោះជាតិទាំងពីរនៅក្រៅឃុំ ដោយពុំបានអានបញ្ជាក់ពីមូលហេតុនៃការសម្រេចចិត្តនេះទេ តែអះអាងថា នៅក្នុងដីកានោះមានប្រាប់ពីមូលហេតុ ។
មេធាវីការពាររឿងក្តីគឺលោក ជូង ជូងី បានហៅការសម្រេចបន្តឃុំខ្លួនកូនក្តីរបស់លោកថា ជារឿងអយុត្តិធម៌ ព្រោះមិនមានភស្តុតាងដាក់បន្ទុកច្បាស់លាស់នោះទេ ។
អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក ណៃ វ៉ង់ដា ដែលបានតាមដានករណីនេះមានប្រសាសន៍ថា វាជារឿងគួរឲ្យសោកស្ដាយ ដោយលោកចាត់ទុកថាការសម្រេចចិត្តនេះមានពាក់ព័ន្ធនឹងរឿងនយោបាយ ។
លោក មាជ សុវណ្ណារ៉ា ថ្លែងថា មានតែថ្នាក់ដឹកនាំនៃគណបក្សប្រជាជនកម្ពុជា និងគណបក្សសង្គ្រោះជាតិនោះទេដែលអាចអន្តរាគមន៍ជួយឲ្យលោកនៅក្រៅឃុំបាន ។
គួររំឮកថា ក្រោយព្រឹត្តិការណ៍ហិង្សាក្បែរស្ពាននាគកាលពីថ្ងៃទី១៥ ខែកក្កដា ឆ្នាំ២០១៤ តុលាការ និងអាជ្ញាធរបានចាប់ខ្លួនតំណាងរាស្ត្រ និងសកម្មជនរបស់គណបក្សសង្គ្រោះជាតិជាបន្តបន្ទាប់ ប៉ុន្តែតំណាងរាស្ត្រ និងសកម្មជនមួយចំនួនត្រូវបានដោះលែងវិញក្រោយកិច្ចព្រមព្រៀងនយោបាយ របស់គណបក្សទាំងពីរ កាលពីថ្ងៃទី២២ ខែកក្កដា ឆ្នាំ២០១៤ ដោយគណបក្សសង្គ្រោះជាតិព្រមចូលធ្វើការក្នុងសភា ៕