សង្គមស៊ីវិលចំនួន៦០មិនគាំទ្រសេចក្ដីព្រាងច្បាប់បោះឆ្នោតថ្មី

សង្គមស៊ីវិលចំនួន៦០មិនគាំទ្រសេចក្ដីព្រាងច្បាប់បោះឆ្នោតថ្មី សង្គមស៊ីវិលចំនួន៦០មិនគាំទ្រសេចក្ដីព្រាងច្បាប់បោះឆ្នោតថ្មី

Public Date: March 10, 2015

អង្គការសង្គមស៊ីវិលដែលធ្វើសកម្មភាពទាក់ទងទៅនឹងការបោះឆ្នោត ប្រជុំបដិសេធសេចក្ដីព្រាងច្បាប់បោះឆ្នោតថ្មី នៅរសៀល

ថ្ងៃទី៩ មីនា ២០១៥។

RFA: ទីន ហ្សា ការីយ៉ា

តំណាងអង្គការសង្គមស៊ីវិល ចំនួន៦០ស្ថាប័ន មិនគាំទ្រចំពោះសេចក្ដីស្នើច្បាប់ចំនួនពីរ គឺ សេចក្ដីព្រាងសេចក្ដីស្នើច្បាប់ស្ដីពីការរៀបចំ និងការប្រព្រឹត្តិទៅនៃគណៈកម្មាធិការរៀបចំ ការបោះឆ្នោត និងសេចក្ដីព្រាងសេចក្ដី ស្នើច្បាប់ស្ដីពី ការបោះឆ្នោតជ្រើសតាំងតំណាងរាស្ត្រ ដែលក្រុមការងារគណបក្សទាំងពីរ បានរៀបចំសិក្ខាសាលាថ្នាក់ជាតិ នៅព្រឹកថ្ងៃទី៩មីនា នេះទេ។

តំណាងអង្គការសង្គមស៊ីវិលទាំងនេះ រួមមាន សម្ព័ន្ធកំណែទម្រង់ការបោះឆ្នោតហៅថា អ៊ឺរ៉ា (ERA) មជ្ឈមណ្ឌលសិទ្ធិមនុស្សកម្ពុជា វេទិកាអង្គការមិនមែនរដ្ឋាភិបាល បណ្ដាញស្ត្រីនិងយេនឌ័រ និងអង្គការជាច្រើនទៀត បានធ្វើសន្និសីទកាសែតរួមគ្នា ដែលធ្វើឡើងភ្លាមៗ បន្ទាប់ពីក្រុម ការងារគណបក្សទាំងពីរបានធ្វើសន្និសីទកាសែតចប់នៅវិមានរដ្ឋសភា នាព្រឹកថ្ងៃដដែលនេះ។

តំណាងអង្គការសង្គមស៊ីវិលទាំងនោះ ដែលធ្វើការតាមដាន ពីសកម្មភាពគណបក្សទាំងពីរបានធ្វើសេចក្ដីព្រាងច្បាប់ទាំងកន្លងមកនេះ បានលើកពីហេតុផលថា ពួកគាត់មិនចូលរួមក្នុងសិក្ខាសាលានេះ ដោយសារតែ សិក្ខាសាលានេះ មិនបានផ្ដល់របៀបវារៈឲ្យអង្គការសង្គមស៊ីវិលជាមុន។ ម្យ៉ាងទៀតឯកសារសម្រាប់ពិគ្រោះយោបល់ គណបក្សទាំងពីរបញ្ជូន ឲ្យកៀកពេលពេក។ ក្រុមអង្គការសង្គមស៊ីវិលចាត់ទុកថា សិក្ខាសាលានេះ ធ្វើឡើងដើម្បីតែផលប្រយោជន៍គណបក្សទាំងពីរប៉ុណ្ណោះ មិនមែនដើម្បីសាធារណជនទូទៅទេ។

ក្រុមអង្គការសង្គមស៊ីវិលទាមទារឲ្យ ក្រុមការងារគណបក្សទាំងពីរ យកសេចក្ដីព្រាងច្បាប់នេះ ដាក់ពិគ្រោះយោបល់ជាមុនសិន មុននឹងដាក់ឲ្យសភាអនុម័ត និងសុំឲ្យទទួលយក រាល់អនុសាសន៍ទាំងឡាយរបស់សង្គមស៊ីវិល និងត្រូវដកចេញមាត្រា៨៤ និយាយពីការគាបសង្កត់អង្គការសង្គមស៊ីវិល និងត្រូវធានាឲ្យមានការគោរពរដ្ឋធម្មនុញ្ញ និង មាត្រា១៥ស្ដីពីគណបក្សនយោបាយ ដែលចែងពីឯករាជ្យភាពរបស់កងកម្លាំងប្រដាប់អាវុធ តុលាការ យោធា មិនឲ្យជាប់ពាក់ព័ន្ធនិងគណបក្សនយោបាយ។ល។

ទោះបីជាយ៉ាងនេះក្ដី នៅក្នុងសិក្ខាសាលាសិក្សាស្វែងយល់ពីច្បាប់ទាំងពីរនេះ ក្រុមការងារគណបក្សទាំងពីរអះអាងថា សេចក្ដីព្រាងច្បាប់នេះល្អជាងច្បាប់ចាស់ដែលធានានូវឯករាជ្យ របស់ស្ថាប័នគ.ជ.ប និងជៀសវាងការជាប់គាំងនៅក្រោយពេលការបោះឆ្នោត។

សមាជិកក្រុមការងារគណបក្សប្រជាជនកម្ពុជា លោក កើត រិទ្ធិ មានប្រសាសន៍ថា ក្រុមការងារគណបក្សទាំងពីរ បានខិតខំធ្វើច្បាប់ទាំងពីរនេះ ក្នុងគោលដៅធានាឲ្យស្ថាប័ន គ.ជ.បថ្មីក្លាយទៅជាស្ថាប័នឯករាជ្យពិតប្រាកដ។

នៅក្នុងសិក្ខាសាលានេះ មានអ្នកចូលរួមជិត៥០០នាក់ ក្នុងនោះមានសមាជិករដ្ឋសភា តំណាងរដ្ឋាភិបាល សិស្សនិស្សិត អង្គទូតមួយចំនួន តំណាងរបស់សហភាពអឺរ៉ុប (EU) និងតំណាងអង្គការសង្គមស៊ីវិលមួយចំនួន។

នៅក្នុងសិក្ខាសាលានេះ ទោះបីជាមិនបានបើកឲ្យសួរដោយសេរីក្ដី ក៏ប៉ុន្តែមានសំនួរជាង៩០សំនួរ ក្នុងនោះ សំនួរឡើងសួរផ្ទាល់ជាង២០សំនួរ និង ៧០សំនួរទៀតសរសេរជាលាយលក្ខណ៍អក្សរ។

ប្រធានក្រុមការងារគណបក្សប្រជាជនកម្ពុជា លោក ប៊ិន ឈិន មានប្រសាសន៍ថា ក្រុមការងារគណបក្សទាំងពីរនឹងលើកយកសំនួរ និងមតិយោបល់ ឬអនុសាសន៍ របស់អ្នកចូលរួមទៅពិចារណា មុននឹងដាក់ឲ្យសភាអនុម័ត៕