.jpg)
អង្គការជាង២០អំពាវនាវកុំឲ្យរដ្ឋាភិបាលកម្ពុជាលូកដៃក្នុងសំណុំរឿង០០៣និង០០៤ អង្គការជាង២០អំពាវនាវកុំឲ្យរដ្ឋាភិបាលកម្ពុជាលូកដៃក្នុងសំណុំរឿង០០៣និង០០៤
គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា(CHRAC)ដែលជាសម្ព័ន្ធនៃសមាគមអង្គការមិនមែនរដ្ឋាភិបាលចំនួន២១ បានអំពាវនាវកុំឲ្យរដ្ឋាភិបាលកម្ពុជាលូកដៃទៅក្នុងសំណុំរឿង០០៣ និង០០៤ ខណៈចៅក្រមបានដាក់ឲ្យជនសង្ស័យ២រូប នៅក្រោមការត្រួតពិនិត្យដោយកំបាំងមុខ។
សេចក្តីប្រកាសព័ត៌មានរបស់CHRACដែលត្រូវបានចេញផ្សាយកាលពីថ្ងៃទី៥ ខែមីនា ឲ្យដឹងថាគណៈកម្មាធិការប្រព្រឹត្តិកម្ម គាំទ្រទាំងស្រុងចំពោះកិច្ចស៊ើបសួរដែលកំពុងបន្តនៃសំណុំរឿង០០៣ និង០០៤ និងស្វាគមន៍ចំពោះការវិវឌ្ឍថ្មី ដែលចៅក្រមកំពុងធ្វើការដើម្បីបញ្ចប់កិច្ចស៊ើបសួរ។ សេចក្តីប្រកាសបន្តថាគណៈកម្មាធិការនៅតែបារម្ភចំពោះការមិនឯកភាពដែលបន្តរវាងសហចៅក្រមស៊ើបអង្កេតជាតិ និងសហចៅក្រមស៊ើបអង្កេតអន្តរជាតិ លើដំណើរការស៊ើបសួរ និងការបដិសេធនៃភាគីជាតិ ដើម្បីគាំទ្រដល់កិច្ចស៊ើបសួរ។
សេចក្តីប្រកាសឲ្យដឹងទៀតថាកិច្ចស៊ើបសួរនៃសំណុំរឿង០០៣ និង០០៤ បានជួបប្រទះការលំបាកតាំងពីលើកដំបូងនៃការចាប់ផ្តើមសំណុំរឿងក្នុងខែកញ្ញា ឆ្នាំ២០០៩។ សេចក្តីប្រកាសបញ្ជាក់ថា«ផ្ទុយពីគោលការណ៍លទិ្ធប្រជាធិបតេយ្យស្តីពីឯករាជ្យភាពតុលាការ និងការបែងចែកអំណាចដាច់ពីគ្នា លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់ផ្សេងទៀត បានធ្វើសេចក្តីប្រកាសជាសាធារណៈតាំងពីដំបូងថាសំណុំរឿងដែលក្រៅពីសំណុំរឿង០០២ គួរកុំដំណើរការ»។
គណៈកម្មាធិការបានអំពាវនាវដល់រដ្ឋាភិបាលកម្ពុជាកុំឲ្យលូកដៃក្នុងសំណុំរឿង០០៣ និង០០៤ ហើយអំពាវនាវដល់រដ្ឋាភិបាលកម្ពុជា«ឲ្យបញ្ឈប់ការប៉ុនប៉ងណាមួយដែលមានឥទ្ធិពលលើលទ្ធផលនៃកិច្ចស៊ើបសួរក្នុងសំណុំរឿង០០៣ និង០០៤»។
កាលពីថ្ងៃទី ២៦ខែកុម្ភៈ លោកនាយករដ្ឋមន្ត្រី ហ៊ុន សែន បានរិះគន់សាលាក្តីខ្មែរក្រហម ករណីពង្រីកវិសាលភាពក្នុងការកាត់ទោស ធ្វើឲ្យអតីតមន្ត្រីក្នុងសម័យខ្មែរក្រហមមានការភ័យខ្លាច ហើយអាចរត់ចូលព្រៃនាំឲ្យមានសង្គ្រាមស៊ីវិលជាថ្មីទៀត។
គួររំឮកថា កាលពីពេលថ្មីៗនេះ សហចៅក្រុមស៊ើបអង្កេតអន្តរជាតិនៃសាលាក្តីខ្មែរក្រហមបានដាក់អតីតមេដឹកនាំខ្មែរក្រហម២រូប គឺ លោក មាស មុត ក្នុងសំណុំរឿង០០៣ និងអ្នកស្រី អ៊ឹម ចែម ក្នុងសំណុំរឿង០០៤ ឲ្យស្ថិតនៅក្រោមការពិនិត្យដោយកំបាំងមុខ។
លោក មាស មុត ត្រូវបានដាក់ឲ្យនៅក្រោមការត្រួតពិនិត្យកំបាំងមុខពីបទឧក្រិដ្ឋ ដូចជាមនុស្សឃាត ដែលជាការរំលោភបំពានក្រមព្រហ្មទណ្ឌកម្ពុជាឆ្នាំ១៩៥៦ និងឧក្រិដ្ឋកម្មប្រឆាំងនឹងមនុស្សជាតិ។ ចំណែកអ្នកស្រី អ៊ឹម ចែម ត្រូវបានដាក់ឲ្យនៅក្រោមការត្រួតពិនិត្យដោយកំបាំងមុខដែរ ដោយសារអំពើមនុស្សឃាតដែលជាការរំលោភបំពានក្រមព្រហ្មទណ្ឌកម្ពុជាឆ្នាំ១៩៥៦ និងឧក្រិដ្ឋកម្មប្រឆាំងនឹងមនុស្សជាតិ ដែលក្នុងនោះមានការធ្វើមនុស្សឃាត ការសម្លាប់រង្គាល ការធ្វើឲ្យទៅជាទាសករ ការដាក់ក្នុងមន្ទីរឃុំឃាំង ការធ្វើទុក្ខបុកម្នេញដោយមូលហេតុនយោបាយ និងអំពើអមនុស្សធម៌ផ្សេងទៀតនៅមន្ទីរសន្តិសុខភ្នំទ្រយោង។
ជនសង្ស័យក្នុងសំណុំរឿង០០៣ មាន២នាក់ គឺលោក មាស មុត អាយុ៧៦ឆ្នាំ ជាមេបញ្ជាការកងទ័ពជើងទឹក និងលោក ស៊ូ មេត មេបញ្ជាការកងទ័ពអាកាស។ ចំណែកសំណុំរឿង០០៤ មានអតីតមេដឹកនាំ៣នាក់ នៅថ្នាក់ភូមិភាគ គឺអ្នកស្រី អ៊ឹម ចែម អាយុ៧២ឆ្នាំ តាអាន និងតា ទិត៕
