លោក មាជ សុវណ្ណារ៉ា មិនសង្ឃឹមបាននៅក្រៅឃុំបើគ្មានការចរចាពីថ្នាក់ដឹកនាំបក្សទាំងពីរ លោក មាជ សុវណ្ណារ៉ា មិនសង្ឃឹមបាននៅក្រៅឃុំបើគ្មានការចរចាពីថ្នាក់ដឹកនាំបក្សទាំងពីរ
VOD៖ ឡាយ សាមាន
សកម្មជនគណបក្សសង្គ្រោះជាតិលោក មាជ សុវណ្ណារ៉ា បានថ្លែងនៅព្រឹកថ្ងៃពុធនេះថា រូបលោកមិនសង្ឃឹមថាបាននៅក្រៅឃុំនោះទេ បើគ្មានការចរចាពីថ្នាក់ដឹកនាំរបស់គណបក្សទាំងពីរដោយលោកអះអាងថា ករណីរបស់លោកគឺជារឿងនយោបាយសុទ្ធសាធ។
ការលើកឡើងរបស់មន្ត្រីគណបក្សប្រឆាំងរូបនេះ ខណៈដែលតុលាការកំពូលនៅព្រឹកថ្ងៃពុធនេះបានលើកពេលប្រកាសសាលដីកាទៅថ្ងៃទី១១ ខែមីនា លើបណ្ដឹងសុំនៅក្រៅឃុំរបស់លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ៥នាក់ទៀត។
មន្ត្រីគណបក្សសង្គ្រោះជាតិលោក មាជ សុវណ្ណារ៉ា ថ្លែងថាលោកមិនមានសង្ឃឹមថានឹងត្រូវបានដោះលែងឲ្យនៅក្រៅឃុំនោះទេ ប្រសិនបើគ្មានការចរចាសម្របសម្រួលរវាងថ្នាក់ដឹកនាំនៃគណបក្សប្រជាជនកម្ពុជា និងគណបក្សសង្គ្រោះជាតិនោះ ។ លោកបានចាត់ទុកករណីឃុំខ្លួនលោកជារឿងនយោបាយសុទ្ធសាធ ។ ទោះយ៉ាងណា លោក មាជ សុវណ្ណារ៉ា សង្ឃឹមថាតុលាការនឹងប្រើប្រាស់អំណាចរបស់ខ្លួនដោយឯករាជ្យដោយមិនរងសម្ពាធនយោបាយ។
លោកថា «ដូចខ្ញុំនិយាយអ៊ីចឹង វាស៊ីសងនៅលើគណបក្សទាំងពីរគេចរចា ព្រោះរឿងនេះជារឿងនយោបាយ អ៊ីចឹងតុលាការត្រូវបានគេចោទថានៅសម្ពាធពីអ្នកនយោបាយ ព្រោះយើងឃើញថា អ្នកទោសគ្រឿងញៀន អ្នកទោសបាញ់សម្លាប់មនុស្ស គេឲ្យនៅក្រៅឃុំ យើងជាអ្នកនយោបាយ ជាបញ្ញវន្ត មានគុណធម៌ គ្មានអំពើហិង្សាគេឲ្យនៅបន្តជាប់ឃុំទៀត»។
មេធាវីការពាររឿងក្តីគឺលោក ជូង ជូងី ប្រាប់អ្នកសារព័ត៌មានបន្ទាប់ពីសាវនាការថា បើផ្អែកលើខ្លឹមសារច្បាប់ និងអង្គហេតុជាក់ស្តែង លោក មាជ សុវណ្ណារ៉ា នឹងត្រូវដោះលែងឲ្យមានសេរីភាព ដោយអះអាងថា ការចោទប្រកាន់របស់តុលាការកន្លងមក លោកសិក្សាឃើញថាមិនមែនជារឿងកុបកម្មឡើយ ។ លោកបញ្ជាក់ថា «ហើយនៅពេលដែលចូលរួមក្នុងថ្ងៃបាតុកម្មនៅទីលានប្រជាធិបតេយ្យនោះ គាត់អត់មានទៅប្រើហិង្សាទេ ហើយនៅក្នុងវីដេអូឃ្លីបដែលខ្ញុំបានសិក្សា ក៏អត់ឃើញគាត់ទៅប្រើហិង្សាជាមួយអ្នកណាទាំងអស់ ហើយនៅពេលដែលគាត់និយាយនៅទីលានប្រជាធិបតេយ្យនោះ គឺគាត់ហាមឃាត់កុំឲ្យមានហិង្សា អ៊ីចឹងហិង្សាកើតឡើងរវាងសន្តិសុខរបស់អាជ្ញាធរ ជាមួយនឹងបាតុករដែលចូលរួមនោះ ប៉ុន្តែតុលាការមកចោទប្រកាន់គាត់ដឹកនាំកុបកម្ម និងចូលរួមក្នុងចលនាកុបកម្ម ដែលកុបកម្មនេះវាជាបទល្មើសធ្ងន់ធ្ងរ ហើយដែលលើសពីការកើតឡើងនៅទីលានប្រជាធិបតេយ្យ» ។
ស្របពេលដែលសវនាការកំពុងដំណើរការ អ្នកគាំទ្រលោក មាជ សុវណ្ណារ៉ា ប្រមាណ៥០នាក់នាំគ្នាស្រែកទាមទារនៅខាងក្រៅតុលាការកំពូល ឲ្យដោះលែងសកម្មជនគណបក្សសង្គ្រោះជាតិដោយឥតលក្ខខណ្ឌ ។
អ្នកវិភាគឯករាជ្យ លោក អ៊ូ វីរៈ យល់ថាការសម្រេចចិត្តរបស់តុលាការកំពូលជារឿងនយោបាយ ដោយរង់ចាំតែថ្នាក់ដឹកនាំបក្សទាំងពីរចរចាគ្នាប៉ុណ្ណោះ ។ លោកសោកស្តាយការដែលអ្នកនយោបាយមានអំណាច ចាប់ខ្លួនសកម្មជនបក្សប្រឆាំង ដើម្បីដាក់សម្ពាធក្នុងការចរចាលើច្បាប់បោះឆ្នោត ។ លោកមានប្រសាសន៍ថា «ខ្ញុំថារឿងនេះជារឿងនយោបាយ ការសម្រេចចិត្តរបស់តុលាការកំពូលជារឿងនយោបាយ ប្រធានរបស់តុលាការកំពូលជាសមាជិកគណបក្សប្រជាជន ជារឿងនិទានបុគ្គលនយោបាយ ដូច្នេះអត់មានអីប្លែកក្រៅពីស្ថានភាពនយោបាយទេ យើងចង់មើលករណីហ្នឹង គ្រាន់មើលរឿងករណីនយោបាយទៅ ។ ខ្ញុំមើលទៅការលើកនេះ វាអត់មានមូលហេតុត្រូវលើក វាអត់មានអីត្រូវរង់ចាំភស្តុតាង ឬមួយរង់ចាំអីផ្សេងទៀតក្រៅតែពីរង់ចាំស្ថានភាពការចរចានយោបាយទេ» ។
លោក អ៊ូ វីរៈ សោកស្តាយចំពោះគណបក្សសង្គ្រោះជាតិផងដែរ ដែលយល់ព្រមឲ្យមានចែងក្នុងច្បាប់បោះឆ្នោត ដោយកំណត់មិនឲ្យសង្គមស៊ីវិលរិះគន់រដ្ឋាភិបាល បែរជាអនុញ្ញាតឲ្យទាហាន និងចៅក្រម ឃោសនាឲ្យបក្សនយោបាយទៅវិញ ។
គួររំឭកថា ក្រោយព្រឹត្តិការណ៍ហិង្សាក្បែរស្ពាននាគកាលពីថ្ងៃទី១៥ ខែកក្កដា ឆ្នាំ២០១៤ តុលាការ និងអាជ្ញាធរបានចាប់ខ្លួនតំណាងរាស្ត្រ និងសកម្មជនរបស់គណបក្សសង្គ្រោះជាតិជាបន្តបន្ទាប់ ប៉ុន្តែតំណាងរាស្ត្រ និងសកម្មជនមួយចំនួនត្រូវបានដោះលែងវិញក្រោយកិច្ចព្រមព្រៀងនយោបាយរបស់គណបក្សទាំងពីរ កាលពីថ្ងៃទី២២ ខែកក្កដា ឆ្នាំ២០១៤ ដោយគណបក្សសង្គ្រោះជាតិព្រមចូលធ្វើការក្នុងសភា ៕