ភរិយាលោកអូបាម៉ានឹងមកបំពេញទស្សនកិច្ចនៅកម្ពុជា ភរិយាលោកអូបាម៉ានឹងមកបំពេញទស្សនកិច្ចនៅកម្ពុជា
VOD៖ ស៊ុន ណារិន
ភរិយារបស់ប្រធានាធិបតីសហរដ្ឋអាមេរិក លោកស្រីMichelle Obama នឹងមកបំពេញទស្សនកិច្ចនៅកម្ពុជានៅថ្ងៃទី២១ ខែមីនា ឆ្នាំ២០១៥ខាងមុខនេះ ដែលជាផ្នែកមួយនៃគំនិតផ្តួចផ្តើមកម្មវិធី Let Girls Learn Initiative«ឲ្យក្មេងស្រីរៀន»។
សេចក្តីប្រកាសព័ត៌មានរបស់ស្ថានទូតអាមេរិកចេញផ្សាយនៅថ្ងៃអង្គារនេះ ឲ្យដឹងថាលោកស្រី Michelle Obama នឹងធ្វើដំណើរទៅប្រទេសជប៉ុន និងកម្ពុជា អំឡុងពេលធ្វើដំណើរចាប់ពីថ្ងៃទី១៨ដល់ថ្ងៃទី២២ខែមីនា ឆ្នាំ២០១៥។ លោកស្រីនឹងចំណាយពេលនៅទីក្រុងតូក្យ ប្រទេសជប៉ុន ចាប់ពីថ្ងៃទី១៨ដល់ថ្ងៃទី១៩ខែមីនា។ បន្ទាប់មកលោកស្រីនឹងធ្វើដំណើរទៅខេត្តសៀមរាប ប្រទេសកម្ពុជាចាប់ពីថ្ងៃទី២១ដល់ទី២២ខែមីនា។
លោកស្រីនឹងដាក់សម្ពោធកម្មវិធី«Let Girls Learn international girls education initiative»។ លោកស្រីនឹងត្រូវអមដំណើរដោយនាយកPeace Corps លោកស្រីCarrie Hessler-Radelet។ កម្ពុជាជាប្រទេស១ក្នុងចំណោម១១ប្រទេសដំបូង ដែលត្រូវបានបញ្ចូលទៅក្នុងកម្មវិធី«Let Girls Learn Peace Corps initiative»នៅក្នុងឆ្នាំដំបូងនេះ។
សេចក្តីប្រកាសបញ្ជាក់ថានៅកម្ពុជាលោកស្រី Michelle Obama និងលោកស្រីHessler-Radelet នឹងពិនិត្យមើលឲ្យដិតដល់ថាតើដំណោះស្រាយបែបណាសម្រាប់សហគមន៍នឹងផ្លាស់ប្តូរជីវិតរបស់ក្មេងស្រី ដែលនេះជាធាតុសំខាន់សម្រាប់កម្មវិធី«Let Girls Learn Peace Corps»៕