សង្គមស៊ីវិលថាចំណុចមួយចំនួនក្នុងសេចក្តីព្រាងសេចក្តីស្នើច្បាប់ គ.ជ.ប ថ្មី អាក្រក់ជាងមុន សង្គមស៊ីវិលថាចំណុចមួយចំនួនក្នុងសេចក្តីព្រាងសេចក្តីស្នើច្បាប់ គ.ជ.ប ថ្មី អាក្រក់ជាងមុន
VOD៖ ណាត សុភាព
មន្ត្រីសង្គមស៊ីវិលនៅថ្ងៃអង្គារនេះរិះគន់ថា សេចក្តីព្រាងសេចក្តីស្នើច្បាប់ គ.ជ.ប ថ្មី ដែលក្រុមការងារកំណែទម្រង់នៃបក្សទាំងពីរបានបញ្ចប់ការពិភាក្សានោះ មានចំណុចមួយចំនួនអាក្រក់ជាងមុន ។
ការរិះគន់នេះ ធ្វើឡើងបន្ទាប់ពីក្រុមការងារកំណែទម្រង់ច្បាប់បោះឆ្នោតនៃបក្សទាំងពីរ បញ្ចប់កិច្ចពិភាក្សាកែសម្រួលចំណុចសេសសល់ចំនួន១៥ និងត្រៀមរៀបចំសិក្ខាសាលាជាមួយសង្គមស៊ីវិលនៅសប្តាហ៍ក្រោយ ដើម្បីសុំយោបល់កែសម្រួលបន្ថែមលើច្បាប់បោះឆ្នោតថ្មីនេះ ។
នាយកប្រតិបត្តិរបស់អង្គការឃ្លាំមើលការបោះឆ្នោតមួយហៅកាត់ថាខុមហ្វ្រែល លោក គល់ បញ្ញា យល់ថា សេចក្តីព្រាងសេចក្តីស្នើច្បាប់បោះឆ្នោត ដែលក្រុមការងារកំណែទម្រង់នៃបក្សទាំងពីរកែសម្រួលពីច្បាប់ គ.ជ.ប ចាស់ដោយមិនឲ្យគណបក្សនយោបាយផ្សេង និងសង្គមស៊ីវិលចូលរួមនោះ មានចំណុចមួយចំនួនអាក្រក់ជាងមុន ។ លោកថា «ចំពោះទាក់ទិន នឹងរឿងឃោសនាបោះឆ្នោត ឃើញអវិជ្ជមានច្រើន វាអាក្រក់ជាងមុនទាក់ទិននឹងពេលវេលាឃោសនា សកម្មភាពឃោសនាក៏កំណត់ដែរ ដូចជាការហែក្បួន ការកំណត់ឲ្យអង្គការសង្គមស៊ីវិល នៃអព្យាក្រឹតឥតលម្អៀង ហើយការបណ្តោយឲ្យកងខេមរភូមិន្ទ នគរបាល មន្ត្រីតុលាការទៅធ្វើសកម្មភាពឃោសនាឲ្យគណបក្សស្របច្បាប់វិញ នោះគឺជាបញ្ហានៅក្នុងរឿងឃោសនាបោះឆ្នោត» ។
យ៉ាងណាក៏ដោយលោក គល់ បញ្ញា បញ្ជាក់ថានៅថ្ងៃសិក្ខាសាលាសប្តាហ៍ក្រោយនេះ សម្ព័ន្ធកំណែទម្រង់ការបោះឆ្នោតហៅកាត់ថា ERA ត្រៀមដាក់អនុសាសន៍ទាក់ទងនឹងការចុះឈ្មោះបោះឆ្នោត រៀបចំបញ្ជីបោះឆ្នោត ការកំណត់ថ្ងៃឃោសនាបោះឆ្នោត ទោសពិន័យបុគ្គលណាដែលប្រមាថគណបក្សនយោបាយជាដើម ដើម្បីឲ្យច្បាប់បោះឆ្នោតថ្មីនេះល្អប្រសើរ ។
VOD មិនអាចសុំការបំភ្លឺបន្ថែមពីប្រធានក្រុមការងារកំណែទម្រង់ការបោះឆ្នោតមកពីគណបក្សប្រជាជនកម្ពុជា លោក ប៊ិន ឈិន បានទេនៅព្រឹកថ្ងៃអង្គារនេះ ។ តែកាលពីថ្ងៃចន្ទម្សិលមិញលោក ប៊ិន ឈិន ថ្លែងបន្ទាប់ពីចប់កិច្ចប្រជុំនៅវិមានរដ្ឋសភាថា ការលើកឡើងរបស់សង្គមស៊ីវិលជាសិទ្ធិសេរីភាពបញ្ចេញមតិរបស់ពួកគេ លោកថាទស្សនមិនដូចគ្នាទាំងអស់នោះទេ ហេតុនេះចាំជជែកបន្ថែមនៅក្នុងថ្ងៃធ្វើសិក្ខាសាលានាសប្តាហ៍ក្រោយ ។ លោកថា «អាហ្នឹងខ្ញុំគិតថាជាទស្សនៈរបស់បុគ្គលទេតើ ឲ្យខ្ញុំទៅប្រាប់គេថា សរសេរសុទ្ធតែល្អទាំងអស់ខ្ញុំក៏មិនពេញចិត្តខ្លួនខ្ញុំដែរ ។ ខ្ញុំមិនដែរអួតថាខ្លួនខ្ញុំ ឬគណៈកម្មការហ្នឹងសរសេរល្អឥតខ្ចោះឯណា ។ ល្អឥតខ្ចោះទៅរកឯណា នោះជាទស្សនៈរបស់គាត់ ទាល់តែធ្វើអញ្ចេះបានល្អ ឯខ្ញុំ ខ្ញុំថាគណៈកម្មការខ្ញុំប៉ុណ្ណឹងគួរសមហើយ ខ្ញុំមិនថាល្អឥតខ្ចោះឯណា» ។
VOD មិនអាចសុំការបំភ្លឺពីប្រធានក្រុមការងារកំណែទម្រង់ការបោះឆ្នោតមកពីគណបក្សសង្គ្រោះជាតិលោក គួយ ប៊ុនរឿន បានទេដោយសារលោកជាប់រវល់ប្រជុំ ។
កាលពីថ្ងៃចន្ទ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា គ.ជ.ប ដែលនឹងបង្កើតថ្មីនេះ មិនឯករាជ្យ ឬល្អគ្រប់គ្រាន់តាមការចង់បានរបស់ប្រជាពលរដ្ឋទេ បើទោះជាគណបក្សប្រឆាំង ព្យាយាមទាមទារចំណុចដែលម្ចាស់ឆ្នោតចង់បានក៏ដោយគឺមិនអាចទៅរួចទេ ។ យ៉ាងនេះក្តី លោករំពឹងថា គ.ជ.ប ថ្មីនឹងប្រសើរឡើងជាង គ.ជ.ប ចាស់ ។ លោកមានប្រសាសន៍ថា «យើងទទួលស្គាល់ថាវាមិនល្អ វាមិនសុក្រិតបានទេ ប៉ុន្តែនេះជាការប្រឹងប្រែងអស់ពីសមត្ថភាពហើយ ក៏ប៉ុន្តែនៅពេល ដូចដែលខ្ញុំជម្រាបជូនបងប្អូនជនរួមជាតិអញ្ចឹងថា យើងមិនអាចបាន គ.ជ.ប ឯករាជ្យទេ អព្យាក្រឹតទេ នៅពេលនេះទទួលស្គាល់ថា មិនអាចបានទេ ក៏ប៉ុន្តែវាក៏ល្អជាងមុនឆ្ងាយណាស់ ល្អជាងគណបក្សប្រជាជនសម្រេចម្នាក់ឯង»។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក នី ចរិយា យល់ថា គម្រោងធ្វើសិក្ខាសាលាសុំយោបល់បន្ថែមលើសេចក្តីព្រាងសេចក្តីស្នើច្បាប់ គ.ជ.ប ថ្មី នោះ គ្រាន់តែធ្វើបង្គ្រប់កិច្ចតែប៉ុណ្ណោះ ។ លោកបន្តថា លោកមិនជឿថាបក្សទាំងពីរទទួលយកសំណើកែសម្រួលចំណុចសំខាន់ៗរបស់សង្គមស៊ីវិលដែលនឹងស្នើឡើងនោះទេ ។ លោកបញ្ជាក់ថា «ការសម្រេចចិត្តនេះ ជាសម្រេចចិត្តខាងនយោបាយ យើងមិនអាចយកមកធ្វើជាលក្ខណៈរូបភាពផ្តល់មតិយោបល់បានទេ ដោយសារនេះជាការចាប់ផ្តើមមួយថ្មីទៀត ហើយជាការដោះស្រាយខាងនយោបាយច្រើនជាងការប្រមូលមតិយោបល់ដោះស្រាយជាសាធារណៈ»។
សូមជម្រាបថា សេចក្តីព្រាងសេចក្តីស្នើច្បាប់បឋមស្តីពីវិសោធនកម្មច្បាប់បោះឆ្នោត ជ្រើសតាំងតំណាងរាស្ត្រមានចំនួន១២ជំពូក និង១៧០មាត្រា ត្រូវបានក្រុមការងារកំណែទម្រង់ការបោះឆ្នោតនៃបក្សទាំងពីរបញ្ចប់កិច្ចពិភាក្សាកាលពីថ្ងៃចន្ទទី២ ខែមីនា ម្សិលមិញនៅវិមានរដ្ឋសភា ។ សេក្តីព្រាងសេចក្តីស្នើច្បាប់ គ.ជ.ប ថ្មីនេះនឹងយកទៅជជែកបន្ថែមនៅក្នុងសិក្ខាសាលាជាមួយសង្គមស៊ីវិលនៅសប្តាហ៍ក្រោយ ដើម្បីសុំយោបល់កែសម្រួលបន្ថែមលើច្បាប់បោះឆ្នោតថ្មីនេះ ៕